लोक वार्ता – राज राठोड
पुणे: शहरामध्ये मसाज पार्लरच्या नावाखाली वेश्याव्यवसाय सुरू असल्याचे प्रकार वारंवार समोर येत आहेत. पोलिसांनी यावर वेळोवेळी कारवाई केली असली तरी काही ठिकाणी अजूनही अशा बोगस सेंटरचे जाळे पसरलेले आहे.
खराडी पोलीस स्टेशनच्या हद्दीत नुकताच अशाच एका मसाज सेंटरवर छापा टाकण्यात आला. तपासात हे ठिकाण मसाज पार्लरच्या नावाखाली वेश्याव्यवसाय चालवत असल्याचे स्पष्ट झाले. पोलिसांनी आरोपींना अटक करून पिटा कायद्याअंतर्गत गुन्हा दाखल केला आहे.
सविस्तर माहिती :पुणे शहरातील खराडी परिसरात ‘व्हाईट लोटस स्पा’ या नावाखाली सुरू असलेला वेश्याव्यवसायाचा काळा कारभार अखेर पोलिसांच्या कारवाईत उघडकीस आला आहे. मसाज सेंटरच्या आड वेश्याव्यवसाय चालवला जात असल्याची धक्कादायक माहिती मिळाल्यानंतर खराडी पोलिसांनी तत्काळ छापा टाकला.
छाप्यात तरुन्नम मनसुर खान (वय ३३, रा. साई सहवास सोसायटी, वाडे बोल्हाई, ता. हवेली) हिच्यावर गुन्हा दाखल करण्यात आला आहे. पोलिसांनी दोन महिलांना ताब्यात घेतले असून त्यापैकी एक महिला परराज्यातील असल्याचे समजते. या प्रकरणात पिटा कायद्याअंतर्गत गुन्हा दाखल करण्याची प्रक्रिया सुरू आहे.
‘व्हाईट लोटस स्पा’ हे खराडीतील तुळजाभवानी नगरमधील द स्पेस बिल्डिंगमध्ये चालवले जात होते. सौंदर्य व आरोग्याच्या नावाखाली महिलांना प्रवृत्त करून वेश्याव्यवसाय करवून घेतला जात असल्याचे पोलिस तपासात स्पष्ट झाले आहे.
पोलिसांनी सांगितले की,या प्रकरणाचा पुढील तपास सुरू असून, अशा प्रकारच्या अनैतिक व्यवसायांना आळा घालण्यासाठी पोलिसांकडून कठोर कारवाई केली जाणार आहे.
