लोक वार्ता – राज राठोड
पुणे शहरात अवैध अग्नीशस्त्र तस्करीला आळा घालण्यासाठी सुरू असलेल्या विशेष मोहिमेत गुन्हे शाखा युनिट–५ने मोठी कारवाई करत गावठी बनावटीची तीन पिस्टले आणि तेरा जिवंत काडतुसे हस्तगत केली आहेत. पिस्टल विक्रीसाठी आलेला एक आरोपी आणि ती खरेदी करणारे दोन आरोपी अशा तिघांना पोलिसांनी ताब्यात घेतले आहे.
पुणे शहरात वाढत्या अग्नीशस्त्र तस्करीच्या पार्श्वभूमीवर संबंधित आरोपींवर कठोर कारवाई करण्याबाबत वरिष्ठ कार्यालयाकडून सातत्याने सूचना देण्यात आल्या होत्या. त्यानुसार पोलीस निरीक्षक युनिट–५ श्री. छगन कापसे यांच्या मार्गदर्शनाखाली गुन्हे शाखा युनिट–५चे पथक अवैध अग्नीशस्त्र व्यवहाराबाबत गोपनीय माहिती संकलित करत होते.
दि. १६ जानेवारी २०२६ रोजी पोलिस अभिलेखावरील आरोपी गौस ऊर्फ निहाल गब्बर मोमीन (वय ३६, रा. आझाद कॉलनी, उस्मानिया मोहल्ला, इदर्गाह जवळ, मिरज, जि. सांगली) हा हडपसर परिसरात गावठी पिस्टल विक्रीसाठी येणार असल्याची खात्रीशीर माहिती पोलीस अंमलदार शशिकांत नाळे व गणेश माने यांना मिळाली. या माहितीनुसार वरिष्ठांच्या सूचनेनुसार काळेबोराटे नगर येथील अग्निशामक दलाजवळ सापळा रचण्यात आला.
सापळ्यादरम्यान पिस्टल विक्रीसाठी आलेला गौस ऊर्फ निहाल गब्बर मोमीन आणि त्याच्याकडून पिस्टल खरेदी करणारे अजय अरुण गायकवाड (वय २७, रा. भोसले वस्ती, म्हाळुंगे इंगळे, ता. खेड, जि. पुणे) व सुनिल नागेंद्र जमादार (वय १९, रा. फ्लॅट नं. सी/१७, द्वारका सेक्टर २ ए, म्हाळुंगे इंगळे, ता. खेड, जि. पुणे) यांना ताब्यात घेण्यात आले.
झडतीदरम्यान आरोपी गौस ऊर्फ निहाल गब्बर मोमीन याच्याकडून १ गावठी पिस्टल व ५ जिवंत काडतुसे, तर आरोपी अजय अरुण गायकवाड याच्याकडून २ गावठी पिस्टले व ८ जिवंत काडतुसे असा एकूण ३ गावठी बनावटीची पिस्टले आणि १३ जिवंत काडतुसे हस्तगत करण्यात आली आहेत.
आरोपी गौस ऊर्फ निहाल गब्बर मोमीन व अजय अरुण गायकवाड हे दोघेही पोलिस अभिलेखावरील आरोपी असून त्यांच्यावर विविध पोलीस ठाण्यांत मारहाण, तोडफोड तसेच खुनासारखे गंभीर गुन्हे दाखल आहेत.
सदरची कामगिरी मा.अपर पोलीस आयुक्त, गुन्हे श्री. पंकज देशमुख, मा. पोलीस उप आयुक्त गुन्हे श्री. निखिल पिंगळे, मा. सहायक पोलीस आयुक्त गुन्हे-२ श्री. राजेंद्र मुळीक यांचे सुचना व मार्गदर्शनाप्रमाणे पोलीस निरीक्षक छगन कापसे, गुन्हे शाखा युनिट ०५, पुणे शहर, पोलीस उप निरीक्षक अभिजीत पवार, पोलीस अंमलदार शशिकांत नाळे, गणेश माने, प्रताप गायकवाड विनोद शिवले, प्रमोद टिळेकर, अकबर शेख, राहुल ढमढेरे, अमित कांबळे, पल्लवी मोरे, स्वाती तुपे, तानाजी देशमुख, शहाजी काळे, प्रशांत कर्णवर, अविनाश इंगळे, नानासाहेब मोरे, अमर चव्हाण, नेत्रिका अडसुळ, नासिर देशमुख व परमेश्वर कदम यांचे पथकाने केली आहे.
