लोक वार्ता –राज राठोड
पुणे शहरातील गुन्हे शाखा युनिट २ व कॉप्स २०२४ मार्शल पथकाने आंबेगाव पोलीस स्टेशन हद्दीत उल्लेखनीय कारवाई केली. गुन्हे प्रतिबंधक पेट्रोलिंगदरम्यान जांभुळवाडी कात्रज तलावाच्या दिशेने भरधाव वेगाने जाणाऱ्या बुलेट दुचाकीवर संशय आल्याने पोलिसांनी पाठलाग सुरू केला.
मार्शलवरील अंमलदार अभिजीत बाठे व सागर खंडाळे यांनी धाडसाने तिन्ही संशयितांना अडवले. चौकशीत त्यांच्या ताब्यातून दोन लोखंडी धारदार हत्यारे आढळून आले. पोलिसांनी तातडीने शस्त्रे व बुलेट दुचाकी जप्त केली.
सविस्तर माहिती अशी की :
आंबेगाव पोलीस स्टेशन हद्दीत कॉप्स २०२४ मार्शल यांनी केलेल्या सतर्क व धाडसी कारवाईमुळे संभाव्य गुन्हा उघडकीस आला आहे. दिनांक १७/१२/२०२५ रोजी गुन्हे शाखा युनिट–२ कडील पोलीस अधिकारी, पोलीस अंमलदार तसेच कॉप्स २०२४ मधील मार्शल आंबेगाव परिसरात गुन्हे प्रतिबंधक पेट्रोलिंग करत होते.
यावेळी आंबेगाव पोलीस स्टेशनकडील मार्शलवरील पोलीस अंमलदार अभिजित बाठे व सागर खंडाळे यांच्या समोरून जांभुळवाडी–कात्रज तलावाच्या दिशेने बुलेट दुचाकी (क्रमांक MH 12/KX/9080) वरून तीन इसम भरधाव वेगाने जाताना दिसून आले. संशय बळावल्याने मार्शलवरील अंमलदारांनी तत्काळ पाठलाग करून जांभुळवाडी तलावाजवळ सदर दुचाकी थांबवली.
थांबवून चौकशी केली असता संशयितांनी आपली नावे
१) प्रथमेश नितीन पंडीत (वय २३, रा. अष्टविनायक मंडळाजवळ, आंबेगाव, पुणे),
२) निखिल बापू गायकवाड (वय २१, रा. सदर),
३) दिपक गणेश गायकवाड (वय १९, रा. सदर)
अशी सांगितली.
अधिक तपासणीदरम्यान या तिघांकडे दोन लोखंडी धारदार हत्यारे मिळून आली. बंदी असताना धारदार शस्त्रे जवळ बाळगून भरधाव वेगाने दुचाकी चालवत असल्याचे निष्पन्न झाले. पोलिसांनी तत्काळ कारवाई करत धारदार हत्यारे व बुलेट दुचाकी जप्त केली.
या प्रकरणी आंबेगाव पोलीस स्टेशन येथे गु.र.नं. ३५८/२०२५ अन्वये शस्त्र अधिनियम ४/२५ तसेच मोटार वाहन अधिनियम ३(१), १८१, १२८ अंतर्गत गुन्हा दाखल करण्यात आला असून, तिन्ही आरोपींना अटक करण्यात आली आहे.
सदरची कामगिरी मा.अपर पोलीस आयुक्त गुन्हे पुणे शहर श्री. पंकज देशमुख, मा. पोलीस उप-आयुक्त गुन्हे शाखा पुणे शहर श्री. निखील पिंगळे, मा. सहा. पोलीस आयुक्त गुन्हे शाखा-१ पुणे शहर श्री. विजय कुंभार यांचे मार्गदर्शनाखाली वरिष्ठ पोलीस निरीक्षक संतोष सोनवणे, सहा. पोलीस निरीक्षक अमोल रसाळ, पोलीस अंमलदार अभिजीत बाठे, सागर खंडाळे व युनिट २ कडील पोलीस अंमलदार यांनी केली आहे.
