लोक वार्ता – राज राठोड
पुणे : तळजाई वसाहतीलगत असलेल्या लुंकड शाळा परिसरात मध्यरात्री वाहनांची तोडफोड झाल्याची घटना घडली. काल रात्री ३ वाजण्याच्या सुमारास तीन जणांनी लाकडी दांडके व बांबूच्या सहाय्याने परिसरातील उभ्या वाहनांची तोडफोड केली. या प्रकरणी सहकारनगर पोलिसांनी तत्काळ कारवाई करत दोघांना ताब्यात घेतले असून, त्यापैकी एक अल्पवयीन असल्याची माहिती आहे.
मिळालेल्या माहितीनुसार, फिर्यादी हे लुंकड शाळेजवळ शेकोटी करत असताना त्यांचा एक नातेवाईक तेथे आला. त्याच्यासोबत आणखी दोन जण होते. या तिघांनी फिर्यादीला शिवीगाळ करत हाताने मारहाण केली. अचानक झालेल्या या प्रकारामुळे फिर्यादी तेथून निघून गेले आणि त्यांनी तात्काळ पोलिसांना फोन करून घटनेची माहिती दिली.
घटनेची माहिती मिळताच सहकारनगर पोलीस घटनास्थळी दाखल झाले. पंचनामा करून तपास केला असता, वाहनांची तोडफोड करणारे आरोपी हे फिर्यादीचेच नातेवाईक असल्याचे निष्पन्न झाले. घरगुती भांडणातून सुरू झालेला वाद पुढे हिंसक वळण घेत, परिसरातील वाहनांवर संताप व्यक्त करत तोडफोड करण्यात आली.
सहकारनगर पोलीस ठाण्याचे वरिष्ठ पोलीस निरीक्षक विठ्ठल पवार यांनी दिलेल्या माहितीनुसार, “फिर्यादी आणि मुख्य आरोपी हे एकमेकांचे नातेवाईक आहेत. घरगुती वादातून मुख्य आरोपीने आपल्या दोन मित्रांच्या मदतीने फिर्यादीला मारहाण केली. त्यानंतर फिर्यादी निघून गेल्यावर, तिघांनी मिळून लाकडी दांडके व बांबूने परिसरातील वाहनांची तोडफोड केली. या प्रकरणात आम्ही तीन आरोपींची ओळख पटवली असून, त्यापैकी दोघांना ताब्यात घेण्यात आले आहे. त्यामध्ये एक अल्पवयीन मुलगा आहे.”पोलिसांनी पुढील तपास सुरू केला असून, कायदेशीर कारवाईची प्रक्रिया सुरू असल्याचे पोलिसांकडून सांगण्यात आले.
