लोक वार्ता –राज राठोड
पुणे (धनकवडी): पुणे शहरात अमली पदार्थ आणि अवैध धंद्यांविरोधात पोलिसांनी सुरू केलेली धडक मोहीम अधिक तीव्र झाली आहे. धनकवडीतील एका उच्चभ्रू गृहनिर्माण संस्थेमध्ये विनापरवाना सुरू असलेल्या हुक्का पार्लरवर सहकारनगर पोलिसांनी धाडसी कारवाई केली आहे. या कारवाईत मालकासह पाच जणांना अटक करण्यात आली असून मुद्देमाल जप्त करण्यात आला आहे.
नेमकी घटना काय?
पुण्याचे पोलीस आयुक्त अमितेष कुमार यांनी शहरातील अवैध हुक्का पार्लरवर कठोर कारवाई करण्याचे आदेश दिले आहेत. या आदेशावरून सहकारनगर पोलीस स्टेशनचे वरिष्ठ पोलीस निरीक्षक विठ्ठल पवार यांनी आपल्या पथकाला विशेष सूचना दिल्या होत्या. ९ फेब्रुवारी २०२६ रोजी रात्री सहकारनगर पोलीस पथक हद्दीत गस्त घालत असताना, पोलीस हवालदार अमोल पवार यांना गुप्त बातमीदारामार्फत महत्त्वाची माहिती मिळाली.
धनकवडी येथील राजमुद्रा हौसिंग सोसायटीतील ‘श्री गुरु नानक कृपा बिल्डिंग’ च्या तिसऱ्या मजल्यावरील टेरेसवर विनापरवाना हुक्का पार्लर सुरू असल्याची खात्रीशीर माहिती मिळताच पोलिसांनी सापळा रचला.
मिळालेल्या माहितीची शहानिशा करून पोलीस उपनिरीक्षक गणेश कर्चे आणि त्यांच्या पथकाने गुरु नानक कृपा बिल्डिंगवर छापा टाकला. टेरेसचा लाकडी दरवाजा तोडून पोलीस आत शिरले असता, तिथे ६ टेबल्स मांडलेली दिसली. त्यातील ४ टेबल्सवर ८ ग्राहक हुक्का ओढताना सापडले.
जप्त केलेला मुद्देमाल:
पोलिसांनी घटनास्थळावरून हुक्का पॉट, विविध फ्लेवर्सचे तंबाखूजन्य पदार्थ, चिलीम आणि इतर साहित्य असा एकूण १२,४९५ रुपयांचा माल पंचासमक्ष जप्त केला आहे.
अटक करण्यात आलेले आरोपी:
या प्रकरणी पोलिसांनी मालकासह वेटरवर कारवाई केली आहे:
१. राजसिंग भजनसिंग गोरोवाडा (वय ३५, मालक)
२. पारस परमानंद शर्मा (वय २४, वेटर – नेपाळ)
३. सुभाष मानसिंग गिरी (वय २०, वेटर – नेपाळ)
४. तिलक भोला तिवारी (वय ३५, वेटर – नेपाळ)
५. नारायण मेघे आचार्य (वय ३४, वेटर – नेपाळ)
कायदेशीर कारवाई:
या पाचही जणांविरुद्ध सहकारनगर पोलीस स्टेशनमध्ये गुन्हा रजिस्टर क्रमांक ४३/२०२६ अन्वये गुन्हा दाखल करण्यात आला आहे. त्यांच्यावर भारतीय न्याय संहिता २०२३ चे कलम १२३, ३ (५) आणि सिगारेट व अन्य तंबाखूजन्य उत्पादने (महाराष्ट्र सुधारणा) अधिनियम २०१८ च्या कलम ४(अ) व २१(अ) नुसार कारवाई करण्यात आली आहे.
पोलीस निरीक्षक विठ्ठल पवार, पोलीस उपनिरीक्षक गणेश कर्चे, हवालदार अमोल पवार आणि सहकारनगर पोलीस स्टेशनच्या तपास पथकाने केली.
पुण्यातील रहिवासी भागांमध्ये अशा प्रकारे अवैध व्यवसाय चालणाऱ्यांवर पोलिसांची करडी नजर असून, भविष्यातही अशा कारवाया सुरूच राहतील, असा इशारा पोलिसांनी दिला आहे.
सदरची कामगीरी मा. पोलीस आयुक्त पुणे शहर श्री. अमितेश कुमार साो, मा. पोलीस सह आयुक्त श्री. रंजनकुमार शर्मा, मा.अपर पोलीस आयुक्त सो पश्चिम प्रादेशीक विभाग श्री. राजेश बनसोडे सोो, पोलीस उपायुक्त परिमंडळ-२, श्री मिलींद मोहीते सोो, सहा. पोलीस आयुक्त, स्वारगेट विभाग धन्यकुमार घोडसे सोो, वरिष्ठ पोलीस निरीक्षक विठ्ठल पवार. पोलीस निरीक्षक (गुन्हे) मनोजकुमार लोंढे यांचे मार्गदर्शनाखाली सहकारनगर पोलीस स्टेशन कडील तपास पथकाचे पोलीस उपनिरीक्षक गणेश कर्चे, सद्दामहुसेन फकीर, सहा. पोउपनिरी बापु खुटवड, पोलीस अंमलदार अमोल पवार, निलेश शिवतरे, किरण कांबळे, बजरंग पवार, सागर सुतकर, आशिष ढमाळ, निखील राजीवडे, अभिजीत वालगुडे, महेश भगत, आकाश किर्तीकर, खंडु शिंदे, अभिमान बागलाने, अमित पदमाळे, मारोती नलवाड, रफीक तडवी यांनी केली आहे.
