लोक वार्ता – राज राठोड
पुणे (हडपसर): महिलांच्या सुरक्षेबाबत तत्परता दाखवत हडपसर पोलिसांनी एका विनयभंग प्रकरणात अवघ्या २४ तासांच्या आत आरोपीला बेड्या ठोकून न्यायालयात दोषारोपपत्र (Charge sheet) दाखल केले आहे. खासगी बसमध्ये प्रवासादरम्यान महिलेचा विनयभंग करणाऱ्या ४७ वर्षीय आरोपीला पोलिसांनी मुंबईतून ताब्यात घेतले.
नेमकी घटना काय:
मिळालेल्या माहितीनुसार, ९ फेब्रुवारी २०२६ रोजी रात्री १० वाजता पीडित महिला आणि तिचे पती काचीगुडा (हैदराबाद) येथून ‘श्री गणेश ट्रॅव्हल्स’ या खासगी बसने हडपसरच्या दिशेने येत होते. प्रवासादरम्यान १० फेब्रुवारीच्या पहाटे २ ते ४ वाजेच्या सुमारास, बसमधील निशीतकुमार यशवंत सिंग (वय ४७, रा. मीरा रोड, मुंबई) याने स्लीपर सीटवर झोपलेल्या पीडित महिलेच्या अंगाला वारंवार स्पर्श करून तिचा विनयभंग केला.
व्हिडीओ पुरावा ठरला महत्त्वाचा:
पीडित महिलेने या घटनेचे प्रसंगावधान राखून आपल्या मोबाईलमध्ये व्हिडीओ चित्रीकरण केले होते. हडपसर पोलीस ठाण्यात तक्रार प्राप्त होताच, भारतीय न्याय संहिता कलम ७४ अन्वये गुन्हा (रजि. नं. ९८/२०२६) दाखल करण्यात आला. पोलिसांनी पीडितेच्या मोबाईलमधील तो व्हिडीओ पुरावा म्हणून पेनड्राईव्हमध्ये जप्त केला आहे.
पोलीसांची तपासातील गती:
वरिष्ठ पोलीस निरीक्षक संजय मोगले यांच्या मार्गदर्शनाखाली आणि पोलीस निरीक्षक (गुन्हे) निलेश जगदाळे यांच्या देखरेखीखाली सहाय्यक पोलीस निरीक्षक हसीना शिकलगार यांनी तातडीने तपासाची चक्रे फिरवली:घटनेचा पंचनामा तातडीने पूर्ण केला.बस मधील प्रवाशांची यादी मिळवून साक्षीदारांचे जबाब नोंदवले. आरोपी निशीतकुमार सिंग याला १० फेब्रुवारी रोजीच अटक करण्यात आली.
२४ तासांत दोषारोपपत्र सादर:
साधारणपणे गुन्ह्याचा तपास आणि दोषारोपपत्र दाखल व्हायला बराच वेळ लागतो, मात्र हडपसर पोलिसांनी सर्व पुरावे आणि तांत्रिक बाबी वेगाने पूर्ण करत २४ तासांच्या आत माननीय न्यायालयात दोषारोपपत्र दाखल केले. पोलिसांच्या या जलद कारवाईमुळे परिसरातून त्यांचे कौतुक होत आहे.
पोलिसांचे आवाहन: महिलांनी प्रवासात किंवा सार्वजनिक ठिकाणी काही अनुचित प्रकार घडल्यास घाबरून न जाता तत्परतेने पोलिसांशी संपर्क साधावा.
सदरची कामगिरी ही मा. पोलीस आयुक्त पुणे शहर, श्री. अमितेश कुमार, मा. पोलीस सह आयुक्त पुणे शहर श्री. रंजन कुमार शर्मा, मा.अपर पोलीस आयुक्त, पुर्व प्रादेशिक विभाग, पुणे शहर श्री. मनोज पाटील, मा. पोलीस उप-आयुक्त परिमंडळ ६, श्री. डॉ राजकुमार शिंदे यांचे मार्गदर्शनाखाली मा. सहाय्यक पोलीस आयुक्त, हडपसर विभाग पुणे श्री. अतुलकुमार नवगिरे, वरिष्ठ पोलीस निरीक्षक हडपसर पोलीस स्टेशन, पुणे शहर श्री. संजय मोगले, पोलीस निरीक्षक (गुन्हे) श्री. निलेश जगदाळे यांचे सुचनांप्रमाणे सहाय्यक पोलीस निरीक्षक हसीना शिकलगार व विनोद शिर्के यांचे पथकाने केली.
