लोक वर्ता – राज राठोड
पुणे : शहरात अत्यंत धक्कादायक घटना उघडकीस आली आहे. रेल्वे स्टेशनवर भेटलेल्या एका ४० वर्षीय बेघर महिलेची वडील–मुलाने निर्घृण हत्या केल्याचा प्रकार समोर आला आहे. येरवडा येथील घरात २ ते ३ दिवस मृतदेह लपवून ठेवून, नंतर तो रस्त्याच्या कडेला फेकल्याची माहिती पोलिस तपासात पुढे आली आहे.
लोहेगाव परिसरात दोन दिवसांपूर्वी एका महिलेचा कुजलेल्या अवस्तेत मृतदेह आढळल्यानंतर या प्रकरणाचा तपास सुरू झाला होता. मृत महिलेची ओळख पटत नसल्याने पोलिसांना मोठी अडचण निर्माण झाली होती. मात्र अखेर सीसीटीव्हीच्या मदतीने पोलिसांनी संशयितांचा शोध घेत दोन्ही आरोपींना बेड्या ठोकल्या.
अटक आरोपी :
रवी रमेश साबळे, वय.३५
रमेश रामचंद्र साबळे, वय.६५
दोघेही रहिवासी : जिजामाता नगर, येरवडा
पोलीस तपासानुसार, मृत महिलेची ओळख सुवर्णा वय, ४० अशी पटली आहे. दोन महिन्यांपूर्वी सुवर्णा आणि रवी यांची भेट पुणे रेल्वे स्टेशनवर झाली होती. दोघेही दिवसभर मजुरी करून जगत होते. हळूहळू सुवर्णा रवीच्या घरी राहू लागली. परंतु किरकोळ कारणावरून दोघांत वारंवार वाद व्हायचे.
हा वाद वाढत गेला आणि अखेर रवि व त्याच्या वडिलांनी रागाच्या भरात वीट व काठीने सुवर्णावर हल्ला केला. गंभीर मारहाण झाल्यामुळे सुवर्णाचा घटनास्थळीच मृत्यू झाला. घाबरलेल्या आरोपींनी मृतदेह घरातच लपवून ठेवला. दोन-तीन दिवसांनी मृतदेहाचे विघटन सुरू झाल्यावर पुरावे नष्ट करण्याच्या हेतूने त्यांनी मृतदेह बेडशीटमध्ये गुंडाळून रिक्षाने लोहेगाव–वाघोली रोडवरील स्मशानभूमीजवळ टाकून दिला.
मंगळवारी सकाळी स्थानिक रहिवाशांना महिलेचा मृतदेह दिसल्याने त्यांनी एअरपोर्ट पोलिसांना खबर दिली.
सीसीटीव्हीने मोकळा केला गुन्ह्याचा गुंता:
पीएसआय नितीन राठोड यांनी परिसरातील सीसीटीव्ही तपासले असता, दिवे बंद असलेली संशयास्पद रिक्षा दिसून आली. तिचा मागोवा घेत पोलिसांनी येरवड्यातील यशवंत नगर येथे रविला ताब्यात घेतले. चौकशीत त्याने गुन्ह्याची कबुली दिली आणि संपूर्ण घटनाक्रम उघडकीस आला. त्यानंतर दोघांनाही अटक करण्यात आली.
एसीपी प्रांजली सोनवणे यांनी दिलेली माहिती:
त्यांच्या म्हणण्यानुसार, मृत महिला बेघर होती. पूर्वी ती भोपाळमध्ये, नंतर मुंबई आणि मग पुणे स्टेशनवर राहत होती. दोन महिन्यांपूर्वी आरोपी रवीशी तिची मैत्री झाली आणि ती त्याच्या घरी राहू लागली. किरकोळ वादातून ही भीषण घटना घडली असून वडील–मुलाने मिळून पुरावे लपविण्याचा प्रयत्न केला.
या प्रकरणाचा पुढील तपास सुरू असून पोलिसांकडून अधिक चौकशी केली जात आहे.
