लोक वार्ता – राज राठोड
पुणे : धनकवडी, तळजाई परिसरात सोमवारी दुपारी एक धक्कादायक घटना घडली. तळजाई शेवटच्या बस स्टॉपवर ५० वर्षीय मजुराने तीन-चाकी टेम्पोला कापडाने गळफास लावून आत्महत्या केल्याची घटना समोर आली आहे. दिवसाढवळ्या घडलेल्या या प्रकारामुळे परिसरामध्ये एकच खळबळ उडाली.
पोलिसांनी दिलेल्या माहितीनुसार, मृताचे नाव भास्कर लोखंडे (वय ५०, रा. तळजाई टेकडी) असे आहे. लोखंडे मजुरी करून उदरनिर्वाह करत होते. पत्नीच्या मृत्यूनंतर ते बहुतेक वेळ घराबाहेर रहात होते. मानसिक तणावाच्या पार्श्वभूमीवर त्यांनी टोकाचे पाऊल उचलल्याचा पोलिसांचा प्राथमिक अंदाज आहे.
घटनेपूर्वी त्यांनी एक तेलाचा डबा घेत तो जमिनीवर ठेवला व त्याच ठिकाणी तीन-चाकी टेम्पोला कापडाच्या सहाय्याने गळफास घेतला. दुपारी साधारण २.३० वाजण्याच्या सुमारास ही घटना घडली.
सहकारनगर पोलीस ठाण्याचे वरिष्ठ पोलीस निरीक्षक विठ्ठल पवार, यांनी दिलेल्या माहितीनुसार: लोखंडे यांना दोन मुले आणि एक मुलगी आहे. ते मजुरीवर अवलंबून होते व अनेकदा घराबाहेरच राहायचे. आत्महत्येचे नेमके कारण अद्याप स्पष्ट नाही; मात्र ही घटना आत्महत्या असून हत्या नाही, हे प्राथमिक तपासात स्पष्ट झाले आहे.”
घटनास्थळावरील सीसीटीव्ही फुटेज जप्त करण्यात आले असून, मृतदेह विच्छेदनासाठी पाठवण्यात आला आहे. सहकारनगर पोलिसांनी याबाबत अकस्मात मृत्यूची नोंद केली असून पुढील तपास सुरू आहे.
