लोक वार्ता – राज राठोड
पुणे | घरफोडी, वाहन चोरी, मोबाईल जबरी चोरी अशा विविध गुन्ह्यांमध्ये असणाऱ्या रेकॉर्डवरील सराईत आरोपीला बिबवेवाडी पोलिसांनी सापळा रचून अटक केली आहे. या आरोपीकडून तब्बल १ लाख ८० हजार रुपयांचा मुद्देमाल पोलिसांनी जप्त केला आहे.
दिनांक १० ऑक्टोबर २०२५ रोजी फिर्यादी महिलेची मोटारसायकल चोरीस गेल्याची तक्रार बिबवेवाडी पोलीस स्टेशनमध्ये दाखल करण्यात आली होती. या गुन्ह्याच्या तपासदरम्यान पोलीस अंमलदार आशिष गायकवाड व विशाल जाधव यांना गुप्त बातमीदारामार्फत माहिती मिळाली की, १६ एकर मोकळ्या मैदानात एक संशयित व्यक्ती चोरीची गाडी घेऊन थांबलेला आहे.
वरिष्ठ अधिकाऱ्यांच्या मार्गदर्शनाखाली पोलिसांनी त्या ठिकाणी छापा टाकला. तेव्हा एक इसम संशयास्पद अवस्थेत आढळून आला. चौकशीअंती त्याची ओळख बाळू प्रभाकर चव्हाण (वय ३८, रा. सदाशिव चाळ, कान्दा मार्केट, जुन्नर एस.टी. स्टँडसमोर, पुणे) अशी पटली. तो रेकॉर्डवरील सराईत गुन्हेगार असल्याचेही तपासात निष्पन्न झाले.
अधिक चौकशीत त्याने मौजमजेसाठी व पैशांच्या गरजेसाठी दुचाकी मोटारसायकली चोरी केल्याची कबुली दिली. तत्काळ त्याच्याकडून बिबवेवाडी पोलीस स्टेशनच्या गु.र.नं. २४३/२०२५ मधील चोरीस गेलेली मोटारसायकल पोलिसांनी हस्तगत केली.
तसेच, आरोपीने जेजुरी पोलीस स्टेशन हद्दीतून दोन मोटारसायकली व १० मोबाइल फोन चोरी केल्याची आणि बिबवेवाडी पोलीस स्टेशन गु.र.नं. २२३/२०२५ मधील घरफोडी केल्याची माहिती पोलिसांना दिली. परिणामी विविध गुन्ह्यांमध्ये त्याचा समावेश असल्याचे उघड झाले.
या संपूर्ण कारवाईत पोलिसांनी एकूण १लाख ८० हजार रुपये किमतीचा चोरीचा मुद्देमाल हस्तगत करण्यात यश मिळवले आहे. पुढील तपास बिबवेवाडी पोलीस स्टेशनद्वारे सुरू आहे.
सदरची कामगिरी मा.अपर पोलीस आयुक्त, पुर्व प्रादेशिक विभाग, पुणे शहर, श्री मनोज पाटील, मा. पोलीस उप-आयुक्त, परिमंडळ ५, पुणे शहर, डॉ. राजकुमार शिंदे, मा. सहा. पोलीस आयुक्त वानवडी विभाग पुणे शहर, श्रीमती नम्रता देसाई, यांचे मार्गदर्शनाखाली वरिष्ठ पोलीस निरीक्षक बिबवेवाडी पोलीस स्टेशन, पुणे शहर श्रीमती अश्विनी सातपुते, पोलीस निरीक्षक (गुन्हे) श्री. सुरज बेंद्रे, यांचे सुचनेप्रमाणे तपास पथक अधिकारी पोलीस उपनिरीक्षक अमोल माने, पोलीस अंमलदार संजय गायकवाड, विनोद जाधव, संजय आग्रे, आशिष गायकवाड, विशाल जाधव, सुमित ताकपिरे, ज्योतिष काळे, शिवाजी येवले, रक्षित काळे, संतोष बनसुडे, दत्ता शेंद्रे व राहूल खाडे यांनी केली आहे.
