लोक वार्ता – राज राठोड
पुणे: विमाननगर पोलीस स्टेशन हद्दीत ‘रुटस् स्पा’वर टाकण्यात आलेल्या धाडीत घडलेल्या धक्कादायक घटनेमुळे पोलिसांच्या कारवाईच्या पद्धतीवर गंभीर प्रश्नचिन्ह निर्माण झाले आहे.
अचानक टाकलेल्या छाप्यादरम्यान निर्माण झालेल्या गोंधळात एका महिलेने आणि स्पाच्या मॅनेजरने इमारतीच्या खिडकीतून उडी मारल्याची माहिती समोर आली आहे. यात गंभीर जखमी झालेल्या महिलेचा उपचारादरम्यान मृत्यू झाला असून मॅनेजर हा गंभीर जखमी अवस्थेत रुग्णालयात उपचार घेत आहे.
सूत्रांकडून मिळालेल्या माहितीनुसार:
रुटस् स्पा’च्या नावाखाली वेश्याव्यवसाय सुरू असल्याची माहिती विमाननगर पोलिसांना मिळाली होती. त्यानुसार पोलिसांनी संबंधित ठिकाणी छापेमारी केली. मात्र, पोलिसांनी अचानक धाड टाकताच स्पामध्ये एकच गोंधळ उडाला.
या गोंधळात एका महिलेने आणि स्पाचा मॅनेजर शेख याने इमारतीच्या खिडकीतून खाली उडी मारली.
उडी मारताना महिलेच्या डोक्याला गंभीर दुखापत झाली. तिला तातडीने रुग्णालयात दाखल करण्यात आले; मात्र उपचारादरम्यान तिचा मृत्यू झाल्याची माहिती समोर आली आहे. दुसरीकडे, मॅनेजर शेख हा गंभीर जखमी असून त्याच्यावर उपचार सुरू आहेत. अशी माहिती सूत्रांकडून मिळाली आहे.
कारवाईवर निर्माण झालेले प्रश्न:
या घटनेनंतर पोलिसांच्या छापेमारीच्या पद्धतीबाबत विविध स्तरांवर चर्चा सुरू झाली आहे.
छापा टाकताना आवश्यक खबरदारी घेण्यात आली होती का?
इमारतीतून कोणी उडी मारू नये यासाठी सुरक्षा व्यवस्था होती का?
अचानक धाड टाकण्यामुळे निर्माण झालेल्या भीतीच्या वातावरणाला जबाबदार कोण?.एका महिलेचा जीव या कारवाई मध्ये गेल्याने, असे अनेक प्रश्न निर्माण झाले आहे
घटनेनंतर पोलिसांकडून अधिकृत भूमिका अद्याप स्पष्ट करण्यात आलेली नसून, वरिष्ठ पातळीवर या प्रकरणाचा आढावा घेतला जाण्याची शक्यता आहे. दरम्यान, मृत महिलेची ओळख आणि नेमकी परिस्थिती याबाबत अधिकृत माहितीची प्रतीक्षा आहे.
विमाननगर परिसरात घडलेल्या या घटनेमुळे पोलिस कारवाईच्या पद्धतीवर गंभीर प्रश्न उपस्थित झाले असून, या प्रकरणाचा तपास कोणत्या दिशेने जातो याकडे सर्वांचे लक्ष लागले आहे.
