लोक वार्ता – राज राठोड
पुणे: पुणे शहरात अंमली पदार्थांच्या तस्करीविरुद्ध सुरू असलेल्या मोहिमेत गुन्हे शाखेच्या अंमली पदार्थ विरोधी पथकाने १२ लाख ४१ हजार रुपये किमतीचा मेफेड्रोन ‘एम डी’ सह दोघांना ताब्यात घेतले आहे.
खराडी येथील आयटी पार्क परिसरात पहाटेच्या सुमारास सापळा रचून पोलिसांनी दोन इसमांना ताब्यात घेतले असून, त्यांच्याकडून १२ लाख ४१ हजार रुपये किमतीचा मेफेड्रोन (MD) हा अंमली पदार्थ जप्त केला आहे.
नेमकी घटना काय:
दिनांक ३ फेब्रुवारी २०२६ रोजी पहाटेच्या सुमारास अंमली पदार्थ विरोधी पथक २ चे अधिकारी व कर्मचारी खराडी पोलीस स्टेशनच्या हद्दीत गस्त घालत होते. पहाटे ५:२८ च्या सुमारास खराडी येथील ईओन आयटी पार्क (फेज २) च्या मागील गेटजवळ दोन संशयास्पद तरुण पोलिसांना मिळून आले. त्यांची झडती घेतली असता, त्यांच्याकडे बेकायदेशीररीत्या विक्रीसाठी आणलेला अंमली पदार्थ सापडला.
अटक करण्यात आलेल्या आरोपींची माहिती:
१. मोतीसिंह श्रवणसिंह राजपुरोहित (वय २८ वर्षे, रा. वाघोली, पुणे; मूळ गाव – बासणी, जि. जोधपूर, राजस्थान)
२. हरीष सुजनाराम देवासी (वय २२ वर्षे, रा. वाघोली, पुणे; मूळ गाव – गुडामालाणी, जि. बाडमेर, राजस्थान)
जप्त केलेला मुद्देमाल
अंमली पदार्थ: २७ ग्रॅम मेफेड्रोन (MD)
एकूण किंमत: १२,४१,०००/- रुपये (साधारण साडेबारा लाख रुपये)
याशिवाय आरोपींकडे असलेले इतर साहित्य आणि रोख रक्कम देखील पोलिसांनी जप्त केली आहे.
कायदेशीर कारवाई
हे दोन्ही आरोपी संगनमताने, विनापरवाना आणि बेकायदेशीररीत्या या अंमली पदार्थांची विक्री करण्यासाठी तिथे आले होते. याप्रकरणी खराडी पोलीस स्टेशनमध्ये एन.डी.पी.एस. (NDPS) अॅक्ट कलम ८(क), २१(ब), २९ अन्वये गुन्हा दाखल करण्यात आला आहे. हे अमली पदार्थ त्यांनी कोठून आणले आणि ते कोणाला विकणार होते, याचा अधिक तपास आता पोलीस करत आहेत.
सदरची कारवाई, मा. पोलीस आयुक्त श्री. अमितेश कुमार, मा. सह पोलीस आयुक्त श्री. रंजनकुमार शर्मा, मा. अपर पोलीस आयुक्त, गुन्हे श्री. पकंज देशमुख, मा. पोलीस उप-आयुक्त, गुन्हे, श्री. निखील पिंगळे, मा. सहा पोलीस आयुक्त, गुन्हे-३, श्री. शंकर खटके यांचे मार्गदर्शनाखाली अंमली पदार्थ विरोधी पथक २, गुन्हे शाखा, पुणे शहर चे प्रभारी पोलीस निरीक्षक श्री. पंडीत रेजितवाड, सहा. पोलीस निरीक्षक नितीनकुमार नाईक, पोलीस उप-निरीक्षक अस्मिता लाड, पोलीस अंमलदार संदिप जाधव, पृथ्वीराज पांडुळे, सुनिल महाडीक, गणेश गोसावी, संदिप देवकाते, देविदास वांढरे, दिनेश बास्टेवाड, शुभांगी म्हाळसेकर व खराडी पोलीस स्टेशन कडील कॉप्स २४ मार्शल चे पोलीस अंमलदार पगारे, जाधव यांचे पथकाने केलेली आहे.
