लोक वार्ता – राज राठोड
या प्रकरणी बांगलादेशी आरोपी एजंट यानी महिलांना ब्युटी पार्लर किंवा टेलरिंगच्या कामाचे आमिष दाखवून भारतात आणले होते. त्यानंतर त्यांना धमकावून व पैशांचे आमिष दाखवून जबरदस्तीने देहव्यापार करण्यास भाग पाडण्यात येत असल्याचे उघड झाले.
बांगला देशी एजंट मुल्ला, बाबु भैय्या ऊर्फ पापा शेख (रा. बुधवार पेठ), भोपसिंग राजपूत (वय २६, रा. जनता बिल्डिंग, बुधवार पेठ), घरमालकीण मीनाक्षी रमेश मेत्री (रा. बुधवार पेठ) अशी गुन्हा दाखल केलेल्यांची नावे आहेत.
पुण्यातील बुधवार पेठ परिसरातील जनता बिल्डिंग येथे सुरू असलेल्या देहव्यापाराच्या अड्ड्यावर फरासखाना पोलिसांनी छापा टाकत चार बांगलादेशी महिलांची सुटका केली असून आरोपी भोपसिंग राजपूत (रा. जनता बिल्डिंग, बुधवार पेठ) याला अटक करण्यात आली आहे. या प्रकरणी फरासखाना पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, डीसीपी झोन-१ ऋषिकेश रावले यांना मिळालेल्या गुप्त माहितीनुसार वरिष्ठ पोलीस निरीक्षक प्रशांत भसमे यांच्या मार्गदर्शनाखाली पोलीस उपनिरीक्षक चंद्रकांत जावळगी व त्यांच्या पथकाने ५ मार्च रोजी सायंकाळी साडेसहा ते रात्री साडेदहा या वेळेत बुधवार पेठेतील जनता बिल्डिंगच्या पहिल्या मजल्यावर छापा टाकला.
या कारवाईदरम्यान चार बांगलादेशी महिला व एक बांगलादेशी पुरुष आढळून आले. पोलिसांनी केलेल्या चौकशीत आरोपींनी या महिलांना ब्युटी पार्लर किंवा टेलरिंगच्या कामाचे आमिष दाखवून भारतात आणले होते. त्यानंतर त्यांना धमकावून जबरदस्तीने देहव्यापार करण्यास भाग पाडण्यात येत असल्याची माहिती मिळाली आहे.
यांच्याविरोधात भारतीय न्याय संहिता कलम १४३ (१), (३), ३ (५) तसेच अनैतिक मानवी वाहतूक प्रतिबंधक कायदा १९५६ अंतर्गत कलम ३, ४, ५, ६ व ७ अन्वये गुन्हा दाखल करण्यात आला आहे.
या कारवाईत पोलिसांनी आरोपी भोपसिंग राजपूत याला ताब्यात घेतले असून इतर आरोपींचा शोध सुरू आहे.
फरासखाना पोलीस या प्रकरणाचा पुढील तपास करत आहेत.
