लोक वार्ता – राज राठोड
पुणे, १६ ऑक्टोबर २०२५ — काळेपडळ पोलीस स्टेशनच्या हद्दीत उंड्री वॉटर एज सोसायटीच्या मागील बाजूस अवैध गावठी हातभट्टी दारू विक्री होत असल्याची माहिती मिळाल्यानंतर पोलिसांनी तत्काळ कारवाई करत एकाला अटक केली आहे.
वरिष्ठ पोलीस निरीक्षक मानसिंग पाटील यांच्या नेतृत्वाखाली पोलिसांचे पथक घटनास्थळी पोहोचले. तपासात आढळले की, हनुमंत मलकाजी मॅकलवाड (वय ५२, रा. होले वस्ती) हा सोमनाथ भिंताडे यांच्या भाडेपट्ट्यावर असलेल्या जागेत गावठी हातभट्टी दारू विक्री करत होता. पोलिसांनी त्याला ताब्यात घेतले असून, घटनास्थळी अतिक्रमण करून बांधलेले शेडही उध्वस्त करण्यात आले आहे.
सदर व्यक्तीविरुद्ध कायदेशीर कारवाईसाठी पुढील प्रक्रिया सुरू असून, त्याला काळेपडळ पोलीस स्टेशनमध्ये आणण्यात आले आहे. यापुढे अशा प्रकारांवर नियंत्रण ठेवण्यासाठी सीआर मोबाईल, मार्शल आणि तपास पथकांना अधिक पेट्रोलिंग करण्याचे निर्देश देण्यात आले आहेत.
ही कारवाई काळेपडळ पोलीस स्टेशनच्या दक्षतेमुळे शक्य झाली असून, परिसरातील नागरिकांनी अशा अवैध कृत्यांची माहिती पोलिसांना देण्याचे आवाहन करण्यात आले आहे.
