लोक वार्ता –राज राठोड
पुण्यात दिवसेंदिवस चोरीच्या गुन्ह्यांमध्ये वाढ होताना दिसत आहे, दिवाळीच्या दिवशी दुकान बंद झाल्यानंतर चार चोरट्यांनी पुण्यातील प्रसिद्ध काका हलवाई मिठाईच्या दुकानात चोरी केल्याचा धक्कादायक प्रकार घडला आहे, या संदर्भात भारती विद्यापीठ पोलीस स्टेशन येथे गुन्हा दाखल करण्यात आला असून आरोपींचा शोध सुरू आहे,
कात्रज, लेक टाऊन सोसायटीमधील प्रसिद्ध ‘काका हलवाई’ मिठाई दुकानावर दिवाळीच्या रात्री चार चोरट्यांनी चोरी केली. दुकानातील काउंटरच्या ड्रॉवरमधून सुमारे २लाख २० हजाराची रोकड आणि २५ हजार रुपये किंमतीचा मोबाईल फोन चोरून नेण्यात आला. ही घटना बुधवारी रात्री ११ ते गुरुवारी सकाळी ७ दरम्यान घडली.
पोलिसांनी दिलेल्या माहितीनुसार, चोरट्यांना परिसरात सीसीटीव्ही कॅमेरे नसल्याची माहिती होती, त्यामुळे त्यांनी दुकानाला लक्ष्य केले. घटनेच्या दिवशी तक्रारदार यांनी रात्री ११ वाजता दुकान बंद करून घरी गेले होते.
मध्यरात्री चोरटे दुकानात आले आणि कटिंग टूल्सच्या साहाय्याने शटरचे कुलूप तोडून आत प्रवेश केला. त्यांनी काउंटरमधील ड्रॉवरमधून रोकड व मोबाईल फोन चोरून नेला.
या प्रकरणी भारती विद्यापीठ पोलीस ठाण्यात भारतीय न्याय संहितेच्या कलम ३०५, ३३१(३) आणि ३३१(४) अंतर्गत गुन्हा दाखल करण्यात आला आहे.
वरिष्ठ पोलीस निरीक्षक राहुल खिलारे यांनी सांगितले की, लेक टाऊन सोसायटीमधील ‘काका हलवाई’ मिठाई दुकानावर दिवाळीच्या रात्री चार चोरट्यांनी चोरी केली . दुकानातील काउंटरच्या ड्रॉवरमध्ये ठेवलेले पैसे त्यांनी घेऊन गेले आहे, चोरट्यांनी चेहऱ्यावर कपडे बांधले होते, दुकानाचे कुलूप तोडून आत प्रवेश केला आणि चोरी केली. दुकानात लावलेल्या सीसीटीव्हीमध्ये त्यांचे फुटेज कैद झाले असून, चोरट्यांचा शोध सुरू आहे. या संदर्भात भारती विद्यापीठ पोलीस स्टेशन येथे गुन्हा दाखल करण्यात आला आहे, मात्र लवकरच त्यांना अटक करण्यात येईल. पुढील तपास सुरू आहे.
