लोक वार्ता – राज राठोड
पुणे : फुरसुंगी पोलीस ठाणे हद्दीत अर्धनग्न अवस्थेत सापडलेल्या बेवारस महिलेच्या खुनाचे गूढ अखेर उलगडण्यात गुन्हे शाखेच्या युनिट ६ पथकाला यश आले आहे. कोणतेही ठोस धागेदोरे किंवा स्पष्ट तांत्रिक पुरावे नसतानाही केवळ एका सीसीटीव्ही फुटेजच्या आधारे पोलिसांनी आरोपीपर्यंत पोहोचत त्याला अटक केली आहे.
३ मार्च २०२६ रोजी हडपसर-सासवड रोडलगत दिवे घाट पायथ्याशी काची कंपनी शेजारील मोकळ्या जागेत, वडकी परिसरात सुमारे ३० ते ४० वर्षे वयोगटातील एका अनोळखी महिलेचा अर्धनग्न अवस्थेत मृतदेह आढळून आला होता. या प्रकरणी फुरसुंगी पोलीस ठाण्यात खुनाचा गुन्हा दाखल करण्यात आला होता.
या गुन्ह्याचा तपास वरिष्ठ अधिकाऱ्यांच्या मार्गदर्शनाखाली गुन्हे शाखेच्या युनिट ६ पथकाकडून सुरू होता. पोलीस निरीक्षक सुदर्शन गायकवाड यांच्या सूचनेनुसार अज्ञात आरोपीचा शोध घेत असताना पोलीस हवालदार अमित कांबळे, पोलीस हवालदार तानाजी देशमुख व युनिट ६ च्या पथकाने अत्यंत बारकाईने तपास सुरू ठेवला.
तपासादरम्यान मिळालेल्या एका सीसीटीव्ही फुटेजच्या आधारे पोलिसांनी संशयिताचा माग काढला,
आरोपी प्रकाश बिभीषन माने, वय २९ वर्षे, व्यवसाय, खाजगी कंपनीमध्ये मॅनेजर, रा. समीर आंबेकर यांच्याकडे भाडयाने, वडकी नाला, ता. हवेली जि पुणे. यास ताब्यात घेतले.
सखोल चौकशीदरम्यान आरोपीने गुन्ह्याची कबुली दिली. आरोपीने संबंधित महिलेसोबत जबरदस्तीने शरीरसंबंध करण्याचा प्रयत्न केला होता. मात्र महिलेने प्रतिकार केल्याने संतापलेल्या आरोपीने तिचा गळा दाबून खून केला. तसेच तिच्या डोक्यात दगड घालून हत्या केल्याचे तपासात उघड झाले आहे.
गुन्हे शाखेच्या पथकाने कोणतेही ठोस धागेदोरे नसताना केवळ तांत्रिक तपासाच्या आधारे गुन्ह्याचा छडा लावत आरोपीला अटक करण्यात आले आहे.
सदरची कामगिरी मा. पोलीस आयुक्त श्री. अमितेशकुमार, मा. पोलीस सह आयुक्त श्री. रंजनकुमार शर्मा, मा. अपर पोलीस आयुक्त, गुन्हे श्री. पंकज देशमुख, मा. पोलीस उप आयुक्त गुन्हे श्री. निखिल पिंगळे, मा. सहायक पोलीस आयुक्त गुन्हे २ श्री. राजेंद्र मुळीक यांचे सुचना व मार्गदर्शनाप्रमाणे पोलीस निरीक्षक सुदर्शन गायकवाड, गुन्हे शाखा युनिट ०६, पुणे शहर, पोलीस अंमलदार तानाजी देशमुख, प्रमोद टिळेकर, प्रशांत कर्णवर, बाळासाहेब सकटे, अमित कांबळे, गणेश माने, शेखर काटे, नानासाहेब मोरे, पल्लवी मोरे, अनिल जामगे यांचे पथकाने केली आहे.
