लोक वार्ता – राज राठोड
पुणे :फरासखाना पोलीस स्टेशन हद्दीत घडलेल्या घरफोडी प्रकरणाचा पोलिसांनी पर्दाफाश करत उल्लेखनीय कामगिरी बजावली आहे. दुकानाचे शटर उचकटून सुमारे १लाख २५हजार रुपयांच्या पॉलीकॅब वायरची चोरी करणाऱ्या टोळीतील ३ आरोपींना अटक करण्यात आली असून २ अल्पवयीन मुलांना ताब्यात घेण्यात आले आहे.
दिनांक १२ फेब्रुवारी २०२६ रोजी श्री भारतीय इलेक्ट्रॉनिक्स या दुकानाचे शटर उचकटून अज्ञात चोरट्यांनी इलेक्ट्रिकल पॉलीकॅब वायर चोरून नेल्याची घटना उघडकीस आली होती. या प्रकरणी अज्ञात इसमांविरुद्ध गुन्हा दाखल करण्यात आला होता.
या गुन्ह्याचा तपास वरिष्ठ पोलीस निरीक्षक प्रशांत भस्मे यांच्या मार्गदर्शनाखाली सुरू करण्यात आला. सहायक पोलीस निरीक्षक वैभव गायकवाड व पोलीस उपनिरीक्षक अरविंद शिंदे यांनी तपासाची दिशा ठरवत घटनास्थळ परिसरातील सीसीटीव्ही फुटेजची बारकाईने छाननी केली.
पोलिस अंमलदार पासलकर, राठोड व खुट्टे यांनी गुप्त बातमीदारांच्या मदतीने संशयितांचा माग काढला.
तपासादरम्यान आरोपी वडारवाडी परिसरात राहत असल्याची माहिती मिळाल्यानंतर पोलिसांनी सापळा रचून ५ संशयितांना ताब्यात घेतले. चौकशीत त्यांनी गुन्ह्याची कबुली दिली.
पोलीस उपनिरीक्षक संतोष गोरे यांनी पुढील आरोपींना अटक केली आहे –
आदित्य संतोष बंडगर (वय २०)
प्रेम भाऊराव बोदडे (वय २१)
पवन संजय चव्हाण (वय १९)
तिघेही राहणार वडारवाडी, शिवाजीनगर, पुणे.
तसेच दोन अल्पवयीन मुलांना ताब्यात घेण्यात आले आहे.
या कारवाईत चोरीस गेलेल्या पॉलीकॅब वायर तसेच गुन्हा करताना वापरलेल्या दोन मोपेड मोटारसायकली असा एकूण २लाख २६हजार १० रुपयांचा मुद्देमाल पोलिसांनी हस्तगत केला आहे.
सदरची कामगिरी मा. अपर पोलीस आयुक्त, पश्चिम प्रादेशिक विभाग श्री. राजेश बनसोडे, मा. पोलीस उप-आयुक्त परिमंडळ-१ पुणे शहर श्री. कृषिकेश रावले, मा. सहा. पो. आयुक्त फरासखाना विभाग श्रीमती अनुजा देशमाने यांचे मार्गदर्शनाखाली वरीष्ठ पोलीस निरीक्षक, श्री. प्रशांत भस्मे यांचे सुचनांप्रमाणे सहा. पोलीस निरी. वैभव गायकवाड, पोलीस उप-निरी. अरविंद शिंदे, पोलीस उप-निरी. संतोष गोरे, पोलीस अंमलदार कृष्णा निढाळकर, प्रविण पासलकर, महेश राठोड, तानाजी नांगरे, नितीन तेलंगे, नितीन जाधव, गजानन सोनुने, सुमित खुट्टे, चेतन होळकर, प्रशांत पालांडे, आनंद माने, महेश पवार, शशिकांत ननावरे यांनी केलेली आहे.
