लोक वार्ता –राज राठोड
पुणे: स्वारगेट पोलीस आणि सामाजिक सुरक्षा विभागाच्या संयुक्त कारवाईत स्पा सेंटरच्या नावाखाली चालणाऱ्या वेश्याव्यवसायाच्या रॅकेटचा पर्दाफाश करण्यात आला आहे. या कारवाईत सहा महिलांची सुटका करण्यात आली असून, या गैरकायदेशीर धंद्याची सूत्रधार असलेल्या ३१ वर्षीय महिलेला अटक करण्यात आली आहे.
ही कारवाई बुधवारी गुलटेकडी परिसरात करण्यात आली. पोलीसांना मिळालेल्या गोपनीय माहितीनुसार ‘वासुधरा आयुर्वेद मसाज सेंटर’ वर छापा टाकण्यात आला. तपासादरम्यान पोलिसांनी सहा महिलांची सुटका केली आणि या धंद्याची प्रमुख आरोपी वैशाली विषपुते (वय ३१, रा. कोंढवा) हिला अटक केली.
पोलीस तपासानुसार, वैशाली गेल्या दोन महिन्यांपासून या मसाज सेंटरच्या आडून वेश्याव्यवसायाचा गैरकायदेशीर धंदा करत होती. पोलिसांनी दिलेल्या माहितीनुसार आरोपीला रंगेहात पकडण्यात आले आहे.
स्वारगेट पोलीस ठाण्याचे वरिष्ठ पोलिस निरीक्षक, निकम यांनी सांगितले की. या प्रकरणी गुन्हा दाखल करण्यात आला असून पुढील तपास सुरू आहे.
दरम्यान, सामाजिक सुरक्षा विभागाच्या वरिष्ठ पोलीस निरीक्षक आशा वाळिंबे यांनी सांगितले की, शहरात अशा बेकायदेशीर कारवायांवर आमचे लक्ष आहे. याआधीही मुकुंदनगर येथील ‘दिया मसाज सेंटर’ वर छापा टाकून एका पीडितेची सुटका आणि कविता नावाच्या आरोपीला अटक करण्यात आली होती. पुढील तपास सुरू आहे
