लोक वार्ता –राज राठोड
पुणे | २२ ऑक्टोबर २०२५ — ऑनलाईन विवाह जाहिरातीच्या माध्यमातून विश्वास संपादन करून तब्बल ११ लाख ४५ हजार ३५० रुपये फसवणूक करणाऱ्या महिलेचा पर्दाफाश करत बिबवेवाडी पोलिसांनी ती रक्कम फिर्यादीस परत मिळवून दिली आहे. सायबर गुन्हे शाखेच्या तांत्रिक विश्लेषणामुळे आरोपी महिला नागपूर येथे निष्पन्न झाली.
फसवणुकीचा प्रकार
दिनांक १८ एप्रिल २०२५ रोजी फिर्यादीने “वर पाहिजे” अशा जाहिरातीवरून दिलेल्या मोबाईल क्रमांकावर संपर्क केला. आकांक्षा पाटील नावाने बोलणाऱ्या व्यक्तीने दुसऱ्या मोबाईलवर ममता जोशीशी संपर्क करण्यास सांगितले. ममता जोशी नावाने बोलणाऱ्या महिलेने कोल्हापुरात मावस बहिण आजारी असल्याचे सांगून, नंतर स्वतःच्या अपघाताचे कारण देत उपचारासाठी आर्थिक मदतीची विनंती केली.
ती पुण्यात परत आल्यावर पैसे परत करेल, असे आश्वासन देत १८ एप्रिल ते १ जून २०२५ दरम्यान फिर्यादीकडून फोनपे मर्चंट अकाउंटवर रक्कम ट्रान्सफर करून घेतली. एकूण ११,४५,३५० रुपये ऑनलाईन फसवणूक झाल्याचे स्पष्ट झाले.
फिर्यादीच्या तक्रारीनंतर बिबवेवाडी पोलीस स्टेशनमध्ये गुन्हा दाखल करण्यात आला. वरिष्ठ अधिकाऱ्यांच्या सूचनेनुसार सायबर टीमने तांत्रिक विश्लेषणाद्वारे आरोपी महिला हर्षला राकेश डेंगळे (वय २८, रा. न्यु ओमनगर, हुडकेश्वर, नागपूर) यास शोधून काढले.
तिला नोटीस पाठवून तपासासाठी हजर राहण्यास सांगितले असता ती पोलीस स्टेशनमध्ये हजर झाली. पोलीस निरीक्षक (गुन्हे) श्री. सुरज बेंद्रे यांच्या तपासात तिने गुन्हा केल्याचे मान्य केले. गुन्ह्यात वापरलेले तीन मोबाईल जप्त करण्यात आले असून, फसवणूक केलेली संपूर्ण रक्कम फिर्यादीस परत मिळवून देण्यात आली आहे.
न्यायालयीन प्रक्रिया आणि पुढील तपास:
दि. १५ ऑक्टोबर २०२५ रोजी आरोपी महिलेस चार्जशीटसह न्यायालयात हजर करण्यात आले. न्यायालयाने तिला जामीन मंजूर केला असून, गुन्ह्याचा पुढील तपास पोलीस निरीक्षक श्री. सुरज बेंद्रे करत आहेत.
गुन्हेगारी सावधगिरीचा इशारा: पुणे पोलिसांचा नागरिकांना सतर्कतेचा संदेश:
पुणे शहरात ऑनलाईन फसवणुकीच्या घटनांमध्ये वाढ होत असल्याच्या पार्श्वभूमीवर, पुणे पोलिसांनी नागरिकांना सतर्क राहण्याचे आवाहन केले आहे.
🔹 फसवणूक करणाऱ्यांपासून सावध रहा
🔹 अनोळखी लिंक, कॉल किंवा मेसेजवर विश्वास ठेवू नका
🔹 वैयक्तिक माहिती शेअर करताना काळजी घ्या
🔹 संशयास्पद व्यवहारांची तात्काळ पोलिसांना माहिती द्या
पोलिस प्रशासनाकडून नागरिकांना गुन्हेगारी सावधगिरीबाबत जागरूक करण्यासाठी विशेष मोहिम राबवली जात आहे. तुमची सुरक्षा तुमच्या सतर्कतेत आहे — फसवणूक टाळा, सुरक्षित रहा.
सदरची कामगिरी मा.अपर पोलीस आयुक्त पुर्व प्रादेशिक विभाग पुणे शहर श्री. मनोज पाटील, मा. पोलीस उप-आयुक्त परिमंडळ ५ पुणे शहर श्री. राजकुमार शिंदे, मा. सहा. पोलीस आयुक्त वानवडी विभाग पुणे शहर श्री. धन्यकुमार गोडसे यांचे मार्गदर्शनाखाली वरिष्ठ पोलीस निरीक्षक बिबवेवाडी पोलीस स्टेशन पुणे शहर श्रीमती अश्विनी सातपुते, पोलीस निरीक्षक गुन्हे श्री. सुरज बेंद्रे यांचे सुचनांप्रमाणे पोलीस अंमलदार संतोष जाधव, विशाल जाधव, मेघा गायकवाड व प्रतिक करंजे यांनी केलेली आहे
