लोक वार्ता –राज राठोड
पुणे: दिनांक २७/११/२०२५ रोजी ११ ते १ वाजताच्या दरम्यान येरवडा पोलीस स्टेशन, पुणे शहर येथे पोलीस उप-आयुक्त, परिमंडळ ४, पुणे शहर यांचे वतीने नागरीकांचे हरविलेले, गहाळ झालेले हस्तगत मोबाईल वितरण कार्यक्रमाचे आयोजन करण्यात आले.
पोलिसांच्या दक्ष तपास व तांत्रिक साधनांच्या सहाय्याने हस्तगत करण्यात आलेल्या तब्बल २८ लाख ३५ हजार रुपये किमतीच्या २०९ मोबाईल फोनचे वितरण करण्यात आले.
हा विशेष मोबाईल वितरण कार्यक्रम पोलीस उप-आयुक्त, परिमंडळ ४ यांच्या मार्गदर्शनाखाली आयोजित करण्यात आला होता. यावेळी मा. अपर पोलीस आयुक्त, पूर्व प्रादेशिक विभाग, पुणे शहर श्री. मनोज पाटील यांच्या हस्ते उपस्थित नागरिकांना त्यांचे मोबाईल परत करण्यात आले.
कार्यक्रमात परिमंडळ ४ मधील १० पोलीस स्टेशनांकडे प्राप्त झालेल्या Central Equipment Identity Register (CEIR) पोर्टलवरील तक्रारी तसेच पुणे शहर पोलीस Lost & Found पोर्टलवरील नोंदींवर आधारित हस्तगत मोबाईल नागरिकांना सुपूर्द करण्यात आले.
मोबाईल परत मिळाल्यावर अनेक नागरिक भावूक झाले. आपल्या भावना व्यक्त करताना नागरिकांनी सांगितले की,
“मोबाईलच्या किंमतीपेक्षा आमच्या भावना अनमोल आहेत. आठवणी, महत्वाचा डेटा आणि अनेकांना जवळच्या व्यक्तींकडून भेट मिळालेला मोबाईल आमच्यासाठी महत्त्वाचा आहे. हरविलेला मोबाईल परत मिळेल अशी अपेक्षाच नव्हती. पण पोलीसांनी आम्हाला आमच्या भावना परत मिळवून दिल्या. त्यामुळे पोलिसांवरील आमचा विश्वास आणखी दृढ झाला आहे.”
हरविलेले मोबाईल शोधून काढण्यासाठी पुणे पोलिसांनी सातत्याने तपास, तांत्रिक विश्लेषण, पोर्टलवरील माहितीची पडताळणी व समन्वय साधत केलेल्या प्रयत्नांचे या कार्यक्रमातून दिसून आले. नागरिकांनी संपूर्ण पोलीस दलाचे मनःपूर्वक आभार मानत पोलिसांच्या या उपक्रमाचे कौतुक केले.
सदर कार्यक्रमास मा. अपर पोलीस आयुक्त, पूर्व प्रादेशिक विभाग, पुणे शहर श्री. मनोज पाटील,, मा. पोलीस उप आयुक्त, परिमंडळ ४, श्री. सोमय मुंडे, मा. सहा. पोलीस आयुक्त, खडकी विभाग, श्री. विठ्ठल दबडे, मा. सहा. पोलीस आयुक्त, येरवडा विभाग श्रीमती प्रांजली सोनवणे, यांच्या सह परिमंडळ ४ मधील १० पोलीस स्टेशनचे वरिष्ठ पोलीस निरीक्षक, तसेच पोलीस अधिकारी व पोलीस अंमलदार व मोठ्या संख्येने नागरीक उपस्थित होते.
