लोक वार्ता – राज राठोड
पुणे : ९ ऑगस्ट २०२५ — आज सकाळी ११ ते १२.३० दरम्यान काळेपडळ पोलीस स्टेशनमध्ये रक्षाबंधनाचा कार्यक्रम उत्साहात पार पडला. महिला दक्षता समिती आणि पोलीस स्टेशनच्या हद्दीतील सुमारे ५० ते ६० महिलांनी वरिष्ठ पोलीस निरीक्षक मानसिंग पाटील यांच्यासह पोलीस बांधवांना राखी बांधून, रक्षाबंधन सण साजरा केला.
कार्यक्रमात उपस्थित महिलांनी पोलीस अधिकाऱ्यांशी संवाद साधत आपुलकीचा आणि विश्वासाचा भाव व्यक्त केला. यावेळी वरिष्ठ पोलीस निरीक्षक मानसिंग पाटील यांनी महिलांशी सुसंवाद साधत महिला सुरक्षेच्या बाबतीत मार्गदर्शन केले व, वाहतुकीचे नियमन आणि तक्रार निवारणासाठी उपलब्ध हेल्पलाइन क्रमांक — १०९८ आणि ११२ — यांची माहिती दिली.
पाटील यांनी उपस्थित महिलांचे आभार मानत सांगितले की, या परिसरातील माता-बहिणींनी कोणत्याही संदर्भातील तक्रारीसाठी बेहिचक पोलीस स्टेशनशी संपर्क साधावा. पोलीस प्रशासन सदैव त्यांच्या सेवेसाठी तत्पर आहे.
कार्यक्रमाने पोलीस आणि नागरिकांमधील विश्वासाचे नाते अधिक दृढ केले असून, सामाजिक सलोखा आणि महिला सुरक्षेच्या दिशेने एक सकारात्मक पाऊल ठरले आहे.
